Fortalezcamos nuestra lengua materna hablando

Tayka aruta amtasiña uruxa khaya 1999 marana UNESCO uksata utt’ayawayata. Khaya 1952 marana, “Bangla” tayka aruxa Paquistán markana yatiqirinakaxa yäqayañataki sartasipxatayna. Ukhama sartasiña utjatapatxa Dhaka palla pallankaxa yatiqirinakaru jiwarayapxatayna. Jichha maranakanxa Bangladesh uka sutimpi markaxa uñt’ataxiwa. Aka qhipa maranakanxa uraqpachana maymaya tayka arunakaxa chhaqhaskiwa. Ukata tayka aruta amtasiña aruxa maymaya kamachinakata ch’amanchata sañani: Ley 070 Avelino Siñani Elizardo Perez, Ley General N° 269 Derechos y Políticas Lingüísticas, Decreto Supremo 1313 kamachinakawa maymaya arusaxa yäqatañapataki arxati.
Tayka aruta amtaskasina, jilata Esteban Quispe Alanoca Aymara Aru Kamani Coordinador del Instituto de Lengua y Cultura Aymara (ILCNA) irpirimpi aruskipawayata. Jilataxa akhama jiskt’awinakaru jayst’awayi.

Kuna pachatixa mä wawaxa yurki ukhata nayraqata tayka aru yatiqi. Ukhamipanxa Aymara markanxa niya taqiniwa wawanakaxa aymara aru arsusawa aru phallayapxi. Ukampinsa janiwa tayka arukiti ukhama sañanakawa utji. Ukhampina arxatiri kamachinakaxa utt’ayasiwayi. Ley General N° 269 Derechos y Políticas Lingüísticas Kamachinsa markachirinakaru iwxt’arakiwa sapa markachirixa khititansa kawkita jutiritansa, kunampisa sartañani uksata thakhisarjama sartañatakiwa ch’amancharaki. Kuna pachatixa mä markachirixa pachpa tayka arupata yäqataki uka pachaxa amuyupa jasaki qhananchi. Ukata tayka aru ch’amanchañaxa wali wakiskirixa.

Jichha maranakanxa yatiña utanakanxa kastilla aru nayriri aru yatichasi aymara yaqha arunakaxa payiri arjama yatichatawa. Taqi Sistema Educativo Plurinacional SEP taypinxa tayka arunakata yatichasiñapawa ukhamaraki sapa markanakana wakiyata Yaticha thakhi (Curriculo Regionalizado) yatiña utanakana yatichirinakaxa yatiqirinakaru yatichasa sapa markanakana sarapa ch’amanchapxañapa. Maysatxa ESFMs Jach’a Yatiña Utanakana tayka aruxa yatichataskarakiwa.

Kunatsa tayka aru ch’amanchañaxa wakisi. Aka qhipha maranakanxa aymara tayka arusa janiwa taqinita yäqataxiti. Kunapachatixa pachpa tayka arusata arsusiñanixa juk’ampi nayraqataru arsuwixa sartayataniwa. Jani ukhamakaspa ukhaxa janiwa sartayata utjkaspati. Ukata wakisispa yatichaña tuqinxa paypacha aruta yatichasispa ukhawa markasa thakhiparu sartaysna. Aymara Aru Kamani (ILCNA) utt’ayata tuqitpacha aymara aru, sara sartayatata qhanancha. Aymara Aru Kamani utatpacha maymaya irnaqawinaka ch’amanchasiwayi, sañani: Yatxatasiwayiwa Ch’uñu chuñuchañxata,pankampixa yatichawiru yanapt’ani. Ukhamaraki Pacha Saraya yatxatataxa wakichataskarakiwa. Maysatxa aymara aru yatichaña thakhi wakicht’ataski, yatichirinakaru purt’ayañataki ukhamata yatiqiri wawanakaxa aymara aru jasaki yatiqapxañapataki. Ukxaruxa aru pirwa (vocabulario pedagógico) wakicht’ataski ukaxa mä tantachawina taqi utt’awinakata jaysatañapawa. Wakicht’ataskiwa aymara qillqanaka panka ukaxa aymara aru arsurinakaru qillqatuqita juk’ampi yanapt’añataki amtampi wakt’ayataski. Aru Pirwa (Diccionario bilingüe) yatiqiri wawakataki wakt’ayatawa. Aka pankanakaxa Yaticha Kamana Utana yanapt’apampiwa sartayataski. Maysatxa Taypi Suyu (Distrito) Kalamarka, Mocomoco, Puerto Pérez, Santiago de Machaqa uksanxa niya mä waranqa yatichiri jilata kullakaru arutuqita yaticht’awayata. Ukhamaraki Dirección Departamental, Ministerio de Educación, Yacimientos Petrolíferos Fiscales Bolivianos uksana irnaqiri jilata kullakanakaru aymara aruta yaticht’ataski. Aka 2016 maranxa khaysa P’utuxsi, Qhuchapampa, Uru uru ukhamaraki Chukiyawu markanakaru aymara aru juk’ampi ch’amanchañataki purt’atani.

Eva Apaza

Técnico CNC-CEPOs